Go otlela ka lebelo
Go otlela ka lebelo la go feta kgaoletšo ya lebelo yeo e beilwego ke gona go bakago 50% ya dikotsi tša dinamelwa tšeo di bakago dikgobalo goba lehu ka Afrika Borwa.
Go otlela ka lebelo go kotsi ka baka la gore go dira maemo a mangwe le a mangwe a go otlela gore a be kotsi. Go otlela ka lebelo go dira gore mmotoro o seke wa kgona go ema gabonolo le gore o seke wa laolega. O na le nako ye nyenyane ya go dira sengwe ka tshoganyetšo.
Dikgaoletšo tša lebelo
Dikgaoletšo tša lebelo di beilwe go ya ka sebopego sa tsela le maemo a dinamelwa. Mebila ya ditoropong, moo go nago le mebotoro ye mentši, e na le dikgaoletšo tša lebelo tša fasenyana go feta mebila ya magaeng yeo e se nago mebotoro ye mentši. Mebila ya kgauswi le dikolong le mafelo a mangwe moo go nago le basepelakadinao ba bantši le yona e ka no ba le dikgaoletšo tša lebelo tša fasenyana.
Dikgaoletšo tša lebelo ka kakaretšo go ya ka Molao wa Mebila wa Bosetšhaba le melawana ya gona ke:
60km/h tseleng ya setšhaba ka gare ga lefelo la toropong
100km/h tseleng ya setšhaba ka ntle ga lefelo la toropong
LEBELO KA MABAKA
Go na le moo e lego gore o swanetše go fokotša lebelo la gago kudu go netefatša gore o otlela ka polokego
Basepelakadinao: Dula o hlokometše basepelakadinao
Dinako tša go ba le sephethephethe: Fokotša lebelo o dule o hlokometše: Diphošo tša go dirwa ke batho ke tšona di bakago dikotsi gabotsebotse.
Pula: Ge tsela e thapile, bokgole bja go ema bo a oketšega. Lebelo le swanetše go fokotšwa kudu.
Ge go ena le phoka le go otlela bošego: Fokotša lebelo la gago ge go sa bonale botse. O gopole go tšhuma mabone, e sego fela mabone a go phaka.
Ditsela tša go se be gabotse: Mešomo ya tseleng le tsela ya go se be gabotse ke phonkgelo ya polokego. Hlokomela dikarolo tša tsela tšeo o ka rego di kotsi.
Go otlela ka lebelo go kotsi le ditseleng tša go ba botse le tša go bolokega. Motho yoo a otlelago ka lebelo o tshwenyana le kelelo ya sephethephethe gomme a ka tsenya le mebotoro ye mengwe kotsing. MOLAO GA O DUMELELE KGOTLELELO YA LEBELO LA GO FETA KGAOLETŠO YEO E BEILWEGO.
Kgaoletšo ya semolao ya bjalwa ka mading ke 0,05g/100ml. Le ge e le gore teko e bontšha gore e ka fase ga kgaoletšo ya semolao, o santše o ka pharwa molato wa go otlela o nwele, ge e le gore go ka ba le bohlatse bja gore o na le tagi ka mading. Ka moo, go kaone go latelela molao: O seke wa otlela o nwele!
Ke baka la eng o se o swanele go otlela o nwele
Tagi e ama mediro kamoka yeo e tlhokegago gore motho a otlele ka polokego
E ama gape ka mokgwa woo o sa kgahlišego hlokomelo ya gago, kahlolo, pono, tekanyo, go kwa, le nako yeo o ka dirago sengwe. O ka se kgone go laola mmotoro wa gago gabotse.
Tagi e dira gore o itshepe kudu le gore o seke wa tlhokomela
O tla dira diphetho tša botlaela ka gare ga sephethephethe
O ka no hwa, wa bolaya/gobatša bašomiši ba bangwe ba tsela
O ka no lefišwa tšhelete yeo e ka fihlago go R24 000 GOBA wa lebanwa ke mengwaga yeo e ka bago ye seswai ka kgolegelong
Laesense ya gago e ka no fegwa dikgwedi tše tharo ge e le gore ke la mathomo, ngwaga ge e le gore ke la bobedi, mengwaga ye tlhano ge e le gore ke la boraro
Mmogo, lebelo le tagi ge di kopane di a bolaya. O seke wa otlela o nwele.
